حول الدانمارك

الأول السلام عليكم ورحمة الله

بصوا ياجماعة أنا صراحة ماكنتش عاوز أكتب أصلا أنا مكسل أكتب أي حاجة وحاليا نفسيتي مش ولابد ولكن كل لما أقلب في حتة الموضوع يستفزني خاصة وانا خلقي ضيق اليومين دول وقاعد اظبط في المدونة واضح إنه زي ماميدو قاال هاتضيع الوقت

ندخل في الموضوع

حكااية الدانمارك وقاطعوا والكلاام اللي بيتقاال
صرااحة أنا رأيي إن كل ده مالووش لزمة
ليييييييييه ؟؟؟؟؟
لأنه حجة الضعيف يعني عامل زي اللي بينضرب وقاعد يقوول ماتقدرش
وشغل الشعارات والكلام ده والمقاطعة ومش المقاطعة
طب الإتحاد الأوروبي المرة اللي فاتت اتحد كله وقال مش هنديلكم حاجة وخليهم يموتوا من الجوع
الفكرة انت اللي محتاجهم مش هم اللي محتاجينك ده من ناحية زائد إن الهيصة دي بدون أي فاعلية هي مثيرة للسخرية
عامل زي اللي انضرب وقاعد يعيط
وتذكروا مافعل هارون الرشيد حين قال : الجواب ماستراه بعينك
وقصة وامعتصماه .......... معروفة طبعا

الناس هتقول ده أضعف الإيمان واحنا الحكومات مش مخليانة والمسلمين ضعفاء
ايوة صح بس مش في كل حاجة

يعني مشلكة المسلمين الحقيقية ليست في الضعف أو عدم الإستطاعة وإنما في توحيد الجهود في إستغلال الإمكانيات في توظيف القدرات هي دي المشكلة
وده بجهود الشعوب
مشكلة المسلمين أنهم غير مبدعين أنهم متواكلون وتقليديون وغير جادين
كل اللي بينشر ويقول قاطعوا أو أغلبهم عشاان ماأظلمش الناس بيعملها عشان يقول أنا كده عملت اللي عليا
بعكس الناس اللي بتسلم من برة في أمريكا وغيرها بيكونوا مخلصين ومستعدين للتضحية وبيتعبوا في سبيل مايعتقدون ومايؤمنون به
معلش استحملوني وكمان باكتب بالعامي مرة كده ومرة كده أصلي مستعجل صراحة .........ا

بعد كل ماقلت يتساءل شخص : رغييت كتير يعني عاوز إيه ؟؟؟؟؟؟

أرد أقول أنا ماعنديش إقتراحات فورية وماينفعش إني أقترح كده
لكن المفروض إن العلماء المتحمسين أو كل الناس المتحمسة يتواصلوا مع بعض
ياجماعة التناقش ........ ( وأمرهم شورى بينهم ) ا يعني تواصل العلماء مع الشباب النشطاء اللي مستعدين يبذلوا الوقت والمجهود مع رجال الأعمال اللي عندهم فلوس كل دول مع بعض

الرد مايكونش بالعياط والزعيق
الرد يكون بلهجة هادئة ورزينة بإن اللي عملوه ده غلط وإن احنا بنستنكر ده ( تااااني إستنكار لا ماهو مش لوحده .... ده مجرد إعلام بإنه غلط فيا ) ( سؤال مش ملاحظين إنهم كرروا الرسوم ثاني يعني ردنا الأولاني عليهم لم يأتي بنتيجة ترجع تاني تكرر نفس الطريقة طب غير طب شوف حاجة تانية ماهي دي مانجحتش لكن لا واحد يقع في حفرة يقوم ويقع فيها تااني بنفس الطريقة مفييش تفكير؟؟؟؟طب مفييش نظر ؟؟؟؟ ) فيه نظرية القطيع الكل بيمشي وخلاص مفيش اجتهاد مفيش إخلاص كله ماشي ورا بعضه
تذكروا زمان الصحابي في غزة بدر اللي سأل النبي عليه الصلاة والسلام عن هل هذا منزل أنزله الله أم هي الحرب والمكيدة
لم يكتف بقوله ده رسول الله وهو أعلم مننا لا الحكاية حارقاه وعاوز ينصح وعاوز يساعد بس بأدب
مش يقول هو انا هأفهم أكتر منهم وأنا مالي انا علي أجاهد وأحارب وخلاص
لا ياجماعة محتاجين تغيير التفكير

نرجع تاني بقى وآسف للإسهاب بس أنا باكتب ع السريع اللي ييجي على بالي أحسن لما ماأكتبش خالص وابقوا انتم رتبوه

الخطوات العملية :
1- الشباب يتجمعوا كل المتحمسين والنشيطين اللي بيرسلوا وبيعملوا وبيجتهدوا في تطليع البضائع الدانماركية يتجمعوا سواء فعليا أو على النت ويبحثوا خطوات للرد
2- يتجمعوا مع العلماء ويتناقشوا في الرد كل العلماء دون اعتبار لتصنيفاتهم ليه مانستغلش الحاجات دي في توحيد الناس ده من ( معلش هاتفرع تاني ) أهم مميزات الجهاد والصعاب إنها بتوحد الأمة لماذا لايتم إستغلال هذه الأحداث في توحيدهم دي مالهاش علاقة بأي حاجة ولا مذاهب ولامربي ذقنه ولا حكومة ولا مااعرفش اييه كلنا مسلمين ومفيش حد هيختلف فيها ودي تكون نقطة لتوحيد الناس والمسلمين
3 - تجميع رجال الأعمال واستعدادهم للتبرع
4- طيب وبعدين مفروض واللازم إن الناس دول يكون عندهم فكر إبداعي للرد المنظم بهدوء وبقسوة ودون أن يغلطنا العالم وبحسابات منطقية دون الإنجراف وراء المشاعر
5- بالمناسبة مفروض عمل آلية ( مابحبش أنا الألفاظ الرنانة دي بس اعمل ايه أمري لله )
لمواجهة أي تهجم على النبي عليه الصلاة والسلام أو الصحابة الكرام
آلية محفوظة وجاهزة دون الاجتهاد والعياط كل مرة على الفاضي

عاوزيين فاااعلية ياجماااااااااااعة
الآلية دي تكون برة وجوة يعني يكون ناس مستعدين لرفع قضايا على أي حد يغلط في الصحابة جوة مصر او برة مصر وفيه إعداد لهم ومساندة لهم ماليا

6- ممكن حتى عمل لجنة دائمة سواء في رابطة العالم الإسلامي اللي مالهاش حس دي مش عارف لييه ؟؟؟؟ حااجة تغييظ وتحرق الدم والله دول مفروض علماء ومفروض دي وظيفتهم إنهم يتجمعوا ويتفقوا وينشروا حلول متفق عليها الكل ينفذها علطول
مفروض يكونوا انشط من كده لكن تقول لمين كل واحد قاعد ينادي في الناس لوحده وخلاص ياعمي روح بس ادعي الشيوخ زمايلك وتناقشوا واطلعوا بحاجات موحدة وعملية والناس هتنفذ
لكن تقول ياميييين ؟؟؟؟؟؟؟؟؟
المهم اللجنة دي تكون جاهزة وتكون نشيطة أو حتى النشيطين يعملوها هم مش لازم الناس دي مادام مش عاوزين


7- ممكن كاجتهادات قد تصلح وقد لاتصلح بعض الإقتراحات للي عاوز يناقشها أو ينشرها :

أ- الرد بكاريكاتيرات على الدانمارك عموما وتكون موجعة
ب- رفع قضايا عليهم في أي مكان
ج- عمل زي اللوبي اليهودي - إنك تتحرى عن اللي رسم ده وعن زعماء الحكاية دي وتفتش في ملفاتهم وأكيد هتلاقي في تاريخهم فساد تكشفها وتبهدلهم ( يمكن ده اقتراح صعب شوية إنما أهوه تفكير ممكن حد يطور الفكرة ) ا
د- مهاجمة مواقع االصحف دي على الإنترنت وفيه عندنا ناس شاطرين في الحكاية دي
ه- عمل لجنة من العلماء وخطاب موحد لإرساله ونشره على الدانماركيين هناك وتصحيح الصورة
و- ممكن رجال الأعمال والحكومات اللي مش لاقيين فلوس يودوها فيين يشتروا بعض هذه الصحف ويبهدلوا اللي عملوا كده ويهاجموا الباقين من عقر دارهم هناك عندهم
ز- لو كل الدوال العربية نشرت رسومات وإعلانات مسيئة لدولة الدانمارك حتى ولو مدفوعة الأجر في أوروبا وفي العالم عموما

ح- نشر أسماء والإعلان عن أسماء المستوردين للبضائع الدنماركية
ط -ده اللي جه على بالي دلوقت مع إنه كاان فييه حااجات تانية بس نسيتها واللي عنده إضافاات يقولها
ي- من الآخر تشووف إيه اللي بيوجعهم وتضرب عليه مش عمال على بطال كده وخلاص

لكن الهيصة دي على الفاضي بتخليهم يضحكوا علينا خاصة لما تكون دون أي رد فعل
محاولة المطالبة بأشياء محددة وصريحة من المسؤولين

يعني ده اجتهاد مني هو ده المفروض لكن اننا نقعد نكلم بعض ونعيط مع بعض وخلاص
هذا فعل الضعفاء وفعل المتخاذلين

لماذا المدونة ؟؟؟

المدونة هي منبر من لامنبر له
أحيانا كثيرة أرى مواقف وتصرفات وأتمنى لو أصرخ
في الناس اقول لهم الصواب أنهاهم عن أخطائهم
أصحح معتقدات أصلح بين أفكار وأناس
ولكن أين ستجد الآذان الواعية وأين ستجد من يسمع لك
أو حتى يتفهم أو يعطيك الفرصة لتشرح له وجهة نظرك
دون أن يقاطعك ودون أن يتفلسف علييك
هي أيضا نوع من الحافز فهي دافع للمرء أن يكتب حين
يرى أن ماكتبه ينشر حتى ولو في باب خلفي إلا أن هذا
في حد ذاته حافز ودافع قوي
أن يصبح لك شيء هو خاص بك تتحكم به كيف تشااء
والإنسان بطبعه يحب التملك
فهو دافع أيضا

تسمية المدونة ؟؟
للأسف لاحظت أن كثيرا من الناس الآن لاهم له سوى
الكلام كل الناس عاوزة تتكلم وتزعق وتتخانق عمال على بطال
وفي ظل هذه الضوضاء يصعب سماع صوت الحق
ويصعب فهم الآخر ويتحول هدفك من الإصلاح ومحاولة
إقناع الآخر إلى أن تفكر كيف يطغى ويعلو صوتك على
صوت الآخرين وكيف تمنع الآخرين من الكلام وكيف
تنتزع حق الكلام انتزاعا
ويصبح الكلام جهدا ضائعا لاهدف منه إذ أن السامع ليس
هدفه أن يسمعك وأن يفهمك بقدر ماهو يخطط كيف يأخذ
منك دفة الحوار وكيف يغلطك وكيف يعلو صوته على
صوتك
ولذا آثرت أن آخذ لي ركنا هادئا أتكلم فيه دون ضوضاء
دون زحاام أفكر بهدوء وبصوت مكتوب حتى تتضح
الكلمات وتظهر المعاني ( ياسلااام لو الواحد كده على
شط البحر قااعد في هدووووء ويتكلم بقى على مزااجه ) ا
كنت هاسميها على فكرة الركن الهاديء بس من زماان
كنت عاوز أجمع كل آرائي وكل ماهو نفسي أتكلم عنه ( قال يعني أنا بقى حااجة خطيرة وآرائي يعني ولا ابن خلدون ههههههه ) تحت ( خواطر من الحياة ) وقعدت محتار وفي الآخر لقيت خواطر من الحياة أعم
وأقرب إلى نفسي ( كان عاجبني عنوان مشابه لكتاب للشيخ علي الطنطاوي رحمه الله اسمه قصص من الحياة )
المدونة هي مكان للحرية مكان للتعبير عن الذات
المدونة هي مكان يتيح لك أن تفضفض دون أن تخشى شيئا
أو تحمل هم نظرات الآخرين ودون أن تجاهد حتى يسمعوك
لو أن للأسف برضه مازلت محدودا بحدود لا أستطيع
تجاوزها مهما حدث
المدونة هي مزيج بين الكتاب والخطابة
فهي كتابة سريعة التواصل مع الآخرين
وهي وسيلة سهلة ويسيرة للتواصل مع الأخرين دون أن تدفع أي تكاليف سواء تليفونات واللا نشر أو أي حااجة
انها مكان لأن تحكي لمن يعدي على الطريق عن همومك
عن أحلامك وعن آمالك وعن معتقداتك
وهي أيضا محاولة لمشاركة الآخرين لك هي محاولة
للإيجابية هي مكان تمسك أنت فيه بدفة الحديث وتقول
كل مافي نفسك
حين يضيق خناق الفاعلية وحين يضيق حيز الإيجابية
فإن المدونة والنت عموما هو أضعف الإيمان
ولعله يصبح يوما من الأيام من أقوى الإيمان

ليه ليهات ؟؟؟

ليهاات ده هو جمع ليه هو صيغة الجمع للسؤال عن السبب
قديما قيل إذا عرف السبب بطل العجب
وبالتالي فإذا عرفنا الأسباب عرفنا كيف نحل المشاكل
عرفنا كيف نعالج الأمراض الصحية والنفسية
والإجتماعية والدولية وغيرها
إذا عرفنا السبب من خلقنا في هذه الحياة ولماذا خلقنا الله
عرفنا ماهو هدفنا ووضحت الصورة أمامنا
( وماخلقت الجن والإنس إلا ليعبدون )
كم من أشيااء هي غامضة وهي صعبة علينا لأننا فقط
لانعرف السبب
ولذلك فمن وجهة نظري ان لييه هو أهم سؤال يجب أن يسأل
برضه عشاان أكون صادق ليهاات ده
كانوا نااس أصحابي في الكلية قاعدين يهزروا ويضحكوا
من كتر هيافتهم وتفاهتهم أنا اتغاظت منهم
قعدت أفكر اعمل اييه لو قلت كده هيقولوا ايه ده هو ماله ؟؟؟ وعايش الدور
قلت طيب ................. إما ورييتكم
رحت شغال تخنييق علييهم
ليه سموها جامعة مش ناقصة
ليه سموها ساعة مش دقيقة وهكذا
الى أن اتخنقوا تماما والحمدلله خدت بتاري منهم
هههههههه وأصبحت كلمة ليه هي من وسائلي لتغيير موضوع الحديث وهي وسيلة لفتح مواضيع ممكن انقلهم بيها من الهزل والهزار إلى الجد دون أن يشعروا وأن أنكش لهم دماغهم وخليهم يحاولوا يشغلوها شوية
وهي يمكن نوع من القافية ومن التلاعب بالألفاظ شوية
يعني كوكتييل غرييب

خنقة المدونات ؟؟؟؟؟؟؟

زحمة يادنيا زحمة ......... زحمة ولاعدش رحمة
مولد وصاحبه غاايب
مش عاارف باستمخ أوي لما اسمعها دي إذا كانت أغنية أصلا ههههههههههه
الأغنية دي هي أحسن توصيف لحال مصر وحال الناس
في العالم كله الآن
بقت هييييصة
كل اللي نفسه في حاجة يعملها
بقت غابة ماهي الزحمة أصلا تخضع لقانون الغااب
حتى المدوناات بقت كتييير
تصدق يااخي حتى انا عملت اهوه مدونة هو ماعدش إلا أنا ده أنا أصلا اتأخرت
اللي بيغيظني بقى في المدوناات ان فيه كتيير منها مش منظم ماتعرفش راسها من رجليها
ماتعرفش اذا كان اللي مكتووب ده هو عنواان موضووع
عنده واللا عنوان مدونة تانية
وتلاقي حاجات غريبة ( الله أعلم اعذروني يمكن أنا اللي جاهل ) تلاقي الحاجات دي اشي يمين واشي شمال
ولاتعرف اول مدونة فيين ولا اخرواحدة فيين
وتقعد تدور على الارشيف تلاقيه هو كماان حكااية
ياجمااعة حبة تنظييم الله يخليكم
ده غيير بقى ان المدوناات اصلا بقت كتيير والواحد عاد
مش ملاحق علييها وتايه فييها
لازم ياجمااعة حد يعمل موقع ينظمها
ايوة ايوة ........
من غيير ماحد يقااطع
عاارف ان فييه مواقع دلوقتي مجمعاهم بس المواقع دي
نفسها عاوزة تنظيم وتجميع هي كمااان
ايه الفوضى اللي احنا فيها دي حتى النت ياجدعاااااااان .
والسلاام ختاام .

ياسلام ياسلام

بسم الله الرحمن الرحيم
نبدأ المدونة بالبسملة
وكمان
السلام عليكم ورحمة الله وبركاته

ياااه أخيرا بقى عندي مدونة إيه التطور اللي أنا فيه ده ياسلام ياسلام ................ا

طبعا دي زي ماأنتم شايفين بأسمي وطبعا خايف مش عارف هأكتب فيها إيه أصلا بس أهوه اديني هاكتب وخلاص اللي يجي على بالي واستحملوني بقى
معلش هاجرب فيكم .....ا

هو أنا مبدأيا عندي أفكاار كتيير بس الفكرة في صياغتها في كيفية عرضها
لكن مش مشكلة أعتقد إن الأهم إن المعنى يوصل وخلااص